Deiseanna fiontair san earnáil fuinneamh adhmaid.

Tugann WDC cuireadh d’fhiontraithe agus d’eagraíochtaí forbartha pobail chuig ceardlann.

Beidh Coimisiún Forbartha an Iarthair (WDC) ina n-óstaigh do cheardlann fuinneamh adhmaid d’fhiontraithe, don lucht gnó agus d’eagraíochtaí a bhíonn ag plé le forbairt pobail agus áitiúil an 3 Nollaig in Óstán Baile Chláir na Gaillimhe.
Pléifidh an cheardlann deiseanna fiontraíochta fuinneamh adhmaid agus na príomhthosca a mbíonn tionchar acu ar fhorbairt na hearnála, agus cuirfear torthaí dhá thionscadal bhainteacha atá díreach críochnaithe ag an WDC i láthair. 
“Beidh an cheardlann ina hábhar spéise do phobail áitiúla, do chuideachtaí LEADER, do chomharchumainn agus d’údaráis áitiúla le tuairim a fháil ar conas is féidir leo earraíocht a bhaint as na deiseanna san earnáil. Ina theannta sin, féadfaidh fiontraithe agus an lucht gnó samplaí rathúla a chloisteáil faoi ghnólachtaí nua fuinneamh adhmaid agus léargas a fháil ar ról na ngníomhaireachtaí poiblí,” a dúirt Gillian Buckley, Príomhfheidhmeannach WDC.
“Má dhéanann Réigiún an Iarthair forbairt ar earnáil bheoga fuinneamh adhmaid, beidh sé ina láimh chúnta leis an bhforbairt tuaithe a spreagadh agus le poist a chruthú, agus is an-tráthúil ar fad an cheardlann seo dá bharr.  Is leochaileach é struchtúr fostaíochta an réigiúin; bhí méadú 59% ar an mBeo-Chlár le dhá mhí dhéag anuas agus bhí an méadú i gcás na bhfear ní ba mhó ag 72%.  Cruthaíonn acmhainní adhmaid an réigiúin deiseanna nua poist agus fiontair,” ar sí.
Dúirt Ian Brannigan, Bainisteoir Forbartha WDC, “Tá an cheardlann ina cuid dár n-obair chun an earnáil fuinnimh in-athnuaite a fhorbairt.  Réimse é seo a thagann le láidreachtaí nádúrtha an réigiúin.  Measann ár dtaighde go bhféadfadh úsáid as adhmad chun fuinneamh teasa a tháirgeadh bheith ina bhunús le €15 mhilliún sa bhreis don gheilleagar in aghaidh na bliana faoin mbliain 2020. Chomh maith leis sin, d’fhéadfadh sé suas le 900 post breise a chruthú i gceantair thuaithe agus €1.7 milliún a chur ar fáil gach bliain d’earnáil feirmeoireachta an Iarthair.  Anuas air sin, b’ionann na hastuithe measta CO2 a shábhálfaí gach bliain agus níos mó ná 92,000 carr a bhaint de na bóithre.”
Tá an margadh fuinneamh adhmaid in Éirinn sách tearcfhorbartha i gcomparáid le tíortha eile.  Ar a shon sin, tá an-deis ag Réigiún an Iarthair sochar a bhaint as an acmhainn in-athnuaite de dheasca go bhfuil 40% d’acmhainní adhmaid na hÉireann le fáil ann.  D’fhéadfadh an tIarthar acmhainn dhúchasach inbhuanaithe in-athnuaite fuinnimh a fhorbairt a chuirfeadh 11% de riachtanais teasa an réigiúin ar fáil faoin mbliain 2020. 
Mhaígh Bernadette Phelan, Feidhmeannach Forbartha Réigiúnaí WDC, “Léiríodh i dtaighde a rinneamar roimhe seo go bhfuil sé de chumas ag Réigiún an Iarthair níos mó ná 470,000 tona breosla adhmaid a sholáthar gach bliain faoin mbliain 2020. Is leor sin chun de bhreis ar 800 meánúsáideoir agus mórúsáideoir teasa a théamh, ar nós ospidéal, óstán, linnte snámha, tithe altranais agus mórbhloic oifige.  Cuirfear torthaí na hoibre a rinne an WDC i gcomhar le Comhairle Contae Dhún na nGall agus le hÚdarás na Gaeltachta i láthair ag an gceardlann.  Sa mhullach air sin, seolfaimid dhá leabhrán faisnéise ag an gceardlann – Fuinneamh Adhmaid agus Fiontar Pobail: Treoir (‘Wood Energy and Community Enterprise: A Guide’) agus Fuinneamh Adhmaid agus Údaráis Áitiúla: Cás-staidéar Dhún na nGall (‘Wood Energy and Local Authorities: Donegal Case Study’).”
Beidh seastán ag Teagasc, Cumann Bithfhuinnimh na hÉireann, an Chomhairle Náisiúnta um Thaighde agus Forbairt Foraoise (COFORD) agus Fuinneamh Inmharthana Éireann (SEI) ag an gceardlann agus beidh a bhfoireann ar fáil le fiosrúcháin a phlé.
Beidh sé saor in aisce freastal ar an gceardlann, ach ní bheidh ach líon teoranta spásanna ann. Mar sin de, ba cheart do dhaoine dul i dteagmháil le Mary Keaveney ag 094 986 1441 nó ag Tá an seoladh ríomhphoist seo á chosaint ó róbat turscair, teastaíonn JavaScript le hé a fheiceáil   faoin 27 Samhain.